Наскрізний зріз української історії від найдавніших часів до сьогодення

Літопис про смерть Ярослава Осмомпсла і початок князювання в Галичі Володимира (1187 р.)

Того же лета преставися Галицький князь Ярослав, сын Володимерь, месяца октября в І день, а во вторый день положен бысть во церкви святыя Богородица. Бе же князь мудр и речен языком, и богобоин, и честен ю землях, и славен полкы: где бо бяшеть ему обида, сам не ходяшеть полцы своими, (но посылашеть я с вое) — водами; бе бо ростроил землю свою и милостыню силну, раздавашеть, страныя любя и нищая корми, черноризскый чин любя и честь подавая от силы своея, и во всем законе ходя божий, к церковьному чину сам приходя и строя добре [клирос]. И ко преставлению своему в болезни тяжце познася худ, и созва мужа своя и всю Галичкую землю, позва же и зборы вся и манастыря, и нищая, и силныя и худыя; и тако глаголаше плачася ко всемь: «отци, и братья, и сынове! Се уже отхожю света сего суетьнаго и иду ко творцю своему, а сгреших пачевсих якоже ин никго не сгреши; а отци и братья! Простите и отдайте!» И тако плакашеться по три дни, передо всими сборы и передо всими людми, и повеле роздавати имение свое манастыремь и нищим; и тако даваша по всему Галичю по три дни, и не могоша раздавати. И се молвяшеть мужемь своим: «се аз одиною худою своею головою ходя, удержал всю Галичкую землю; а се приказываю место свое Олгови, сынови своему меншему, а Володимеру даю Перемышль»; и урядив я, и приводи Володимера ко хресту и мужи Галичкыя на семь, яко ему не искат под братом Галича. Бящеть боОлег Настасьчичь, и бе ему мил, а Володимер же хожаше в воле его, и того деля не дашеть ему Галича. По смерти же Ярославле, бысть мятежь велик в Галичкой земли: и сдумавше мужи Галичкыи с Володимером, переступишеть хрестьное целование и выгнаша Олга из Галича; и беже Олег отгуду во Вручий к Рюрикови, а Володимер седе в Галиче, на столе деда своего и отца своего.



Підтримати сайт і наші Збройні Сили можна за посиланням на Buy Me a Coffee.