Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Галицько-Волинський літопис про похід князя Данила в литовські землі (1258 р.)

[В лето 6766.] Данило же с братом идоша к Взвяглю, в силе тяжце, жда вести от Романа и литвы; и стоя на Корецку днину, жда вести от них, и пойде к Возвяглю. Преже посла сына си Шварна, да обьедеть град, да никто же не утечеть от них: бе же с ним воин пять сот. Гражане же видевше ратных мало с княземь, смеахуся стоаще на граде. Наутриа же прийде Данил с многым множьством полком, с братом си и с сыном Лвом; видевше же гражане, [и] ужась бысть в них, и не стрпеша и вдашася; и город зажьже, люди же изведе и вдасть я на подел, ово брату си, ово же Лвови, другиа Шварнови, и пойде в дом си прием град. Романови же пришедши к граду и литве, потекши на град литве, не видеша ничто же, токмо головне ти, псы течюще по городищю; тужаху же и плеваху, по-свойскы рекуща: «Янда», взывающе Богысвоа, Аньдая и Дивирикса, и вся Богы своа поминающи, рекомыа беси. По том Роман еха по отци, поемь с собою мало людий, а прочиа пусти домовь. Данило же и Василко бяше веселяся, а Лев еха домовь си. Литва же роздумавше и воеваша, гневь држаще; ехавше же воеваша около Луческа. Данилови же не ведуще и Василкови, служащий же князи Данилови и людие Василкови, Гюргий, Олекса дворьский, и инии ехаша на ня. Ехавшим же на ня, онмь же притекшим супротивь Кструзе, снузником же сразившимся, не стрпеша, но на бег обратишася. Они же секущея и бодуще, вгнашеся в озеро, имется десять мужь одиного коня, мняще, яко «конь вынесеть нас» — и тако погрязаху, аггелом потомляеми от Бога посланным; и нагрязе же озеро труповь и щитовь и шеломовь; тоземльци же велику користь имаху влочаще я. И бысть на литву сеча велика. Одолевшим славяху Бога и святую Госпожю Богородицю; послаша же сайгат Данилови и Василкови, и обрадовастася Данил и Василко о помощи Божий, еже на поганыа. Се бо быша людие Миньдовгови, воєвода их Хвал, иже велико убийство творяше земли Чернеговьской, и Сирвидь Рушковичь; Сирвидь же утече, а Хвал убит бысть, и инии мнози.