Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Галицько-Волинський літопис про обкладання ятвязьких земель даниною (1257 р.)

[В лето 6765.] По том же [Данило] посла Коснятина, рекома Положишила, да побереть на них дань. Ехав же Коснятин поима на них дань черныа куны и бело сребро, и вдасть ему из дани ятвяжьскоа дар Сигневу въеводе, послушества ради, да у весть вся земля Лядьскаа, яко дань платили суть ятвязи же королеви Данилу, сынови великаго князя Романа. По великом бо князи Романе никто же не бе воевал на не в рускых князех, разве сына его Данила, Богом же данаа ему дань, послушество створи Лядьскою землею, сиречь в память детемь своим, яко от Бога мужьство ему показавши); яко же премудрый гронографь списа: яко же добродеяниа в векы святятся. Яко же сказахом о ратех многых, и си же написахом о Романе: древле бо бе писати си, и ныне же зде писано бысть в последняа.

По том же, яко же и преже рекохом, створи король велик обет и не исправи его к Романови, остави же у городе и Неперьце и отьидеть прочь, обещавься ему и не помагаше ему, лесть бо имяше хотя городовь его; бе бо клятвою клялся о Бозе великою к Романови и к княгини его, яко добывши) ему земли Немецкое дати ему всю Романови; княгини же ведущи норовь его, твердяшеть и крестом, И НИКОЛИ же не бысть на помощь ему. Часто же приходящю [ему] на нь герьцикови, в одино же время приехавшю ему с великою силою и бившимся им, и ставь пред городом поприща и не можеть взяти. Ласканьемь глаголяше ему: «Остави короля угорьского, яко ужика ми еси и своякь, земля Немецькаа разделена будеть с тобою: риксь ти угорьский, рече король, много обещаваеть, но не исправить; аз же глаголю правду и поставлю ти послуха, отца си папу и 12 епискупа, на послушество, и вдам ти пол земле Немецкое». Оному же рекшю: «Правдою обещахся отцю королевиугорьскому, не могу послушати тебе, яко срам имам и грех не исполнити обета». Посла бо к королеви угорьскому вся словеса, ими же обещевашеся ему герцюкь, и прося у него помощи; он же не посла ему помощи, но городов хотящю ему о собе, обещеваше же ему дати иныя городы в земли Угорьской. [...]