Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Літопис про боротьбу галицьких князів Мстислава Удалого і Данила Романовича з іноземними завойовниками (1226-1227 pp.)

Мьстислав же, по совете льстивых бояр Галичьких, вда дщерь свою меншую за королевича Андрея, и дасть ему Перемышль. Андрей же послушав лестивого Семьюнка Чермьнаго, и бежа во Угры и нача воздвигати рать; бывши же зиме, прииде ко Перемышьлю, Юрьеви тогда тысящю удержащю, переда Перемышль и бежа сам ко Мьстиславу. Королеви же ставило во Звенигороде, и посла вой свои к Галичю, сам бо не сме ехати к Галичю: поведахуть бо ему волхвы Угорьскыя, яко узревшу Галичь не быти ему живу; он же тоя ради вины не смея ити в Галичь, яко веряшеть волхвом. Днестру же наводнившюся, не могоша перейти. Мьстислав же выеха противу с полкы; онем же позоровавшим нас, и ехаше Угре во станы своя: бе бо с королемь Пакослав с Ляхы. Оттуду же пойде король ко Теребовлю и взя Теребовль, и пойде к Тихомлю и взя Тихомль; оттуду же приде ко Кремянцю, и бися под Кремянцем, и много Угор избиша и раниша. Тогда же Мьстислав Судислава посла к зяти своему князю Данилу, рекый: «не отступай от мене»; оному же рекшю: «имам правду во серци своемь». Оттуду же приде король ко Звенигороду. Выеха же Мьстислав из Галича, Угре же выехаша противу ему со станов Королевых, Мьстислав же бися с ними и победи я; и гнаша по них до станов Королевых, секуще и; тогда же Мартиниша убиша, воєводу королева. Король же смятеся умом, и пойде и[з] земли борзо. Данилови же пришедшу ко Мьстиславу с братом Василком ко Городку, и Глеб с нима, и молвящим им: «пойди, княже, на короля, по Лохти ходить», Судислав же браняшеть ему, бе бо имеяшеть лесть во серци своем, не хотяше бо пагубы королеви, имеяше бо в немь надежу велику: беаше бо король изнемоглся. Льстькови же в то время идущу в помощь, Данилови же бранящю ему не помогати королеви, оному наипаче хотящю, Данил же и Василко посласта люди своя к брату, не даста ему прити; остуду же возвратився иде во свою землю: изнемогл бо ся бе ходив на войну. А король Угорьскы иде во Угры. Тогда же угони Изяслав со лестивым Жирославом, идоста с ним Угры. Потом же Судиславу льстящю подо Мьстаславом, рече ему: «княже! дай дщерь свою обрученую за королевича, и дай ему Галичь: не можешь бо держати сам, а бояре не хотять тебе». Оному же не хотящю датикоролевичю, найпаче хотящю дати Данилови, Глебови же Зеремеевичю и Судиславу претяща ему не дати Данилови, реста бо ему: «аже даси королевичю, когда восхощеши можеши ли взяти под нимь;даси ли Данилови, в векы не твой будеть Галичь». Галичаном бо хотящим Данила, отсуду же послаша в речих, Мьстислав дасть Галичь королевичю Андрееви, а сам взя Понизье; оттуду иде к Торьцкому. Мьстиславу же Немому давшу отчину свою князю Данилови, и сына своего поручив Ивана, Ивану же умершю, и прия Луческ Ярослав, а Черторыеск Пиняне.

В лето 6735. Начнемь же сказати бесчисленыя рати, и великыя труды, и частыя войны, и многия крамолы, и частая востания, и многия мятежи, измлада бо небы има покоя.

Седящу же Ярославу в Лучьске, еха Данил в Жидичин кланяться и молитися святому Николе, и зва и Ярослав к Лучеську; и реша ему бояре его: «приими Луческ, зде ими князя их»; оному же отвещавшу, «яко приходах зде молитву створити святому Николе и не могу того створити», иде в Володамерь. Оттуду же, собравша рать, посласта на нь Андрея, Вячеслава, Гаврила, Ивана; оному же въехавшу, ят бысть с женою своею, ят же бысть Олексою Орешьком: бе бо борз конь под ним, утонив и, и я его до города; и затворишася Лучане. На утрея же приде Данил и Василко, и предашася Лучане; брат же на Василкови Луческ и Пересопницю Берестой же ему бе преже дал. Повоеваша Ятвязи около Берестия и угониста и из Володимеря, наехавшима же дверма Мондуничю Шутрови и Стегугови Зебровичю на полк, и убьен бысть Данилом и Вячеславом Шютр, а Стегут убьен бысть Шелвом. Бежащим же Ятвяземь, угони я Данил, Небра язви четырми ранами, древо же вышибе копье из руку его; Василкови угонившу его, клик бысть велик: «брат та биется назади»; оному же оставшу, обратися брату на помощь, оному же симь утекшу, а инии разбегошася. Мы же, се оставлеше, на преднее возвратимся.

Данил же посла Дьмьяна ко тести своему, река ему: «не подобаеть Пиняном держати Черторыиска, яко не могу им терпети». Демьянови же повестящу с ним: «сыну! сгреших не дав тобе Галича, но дав иноплеменьнику, Судислава льстьця светом, обольсти бо мя; ажь Бог восхочеть, пойдиве на ня, яз всажу Половци, а ты своими, аще Бог дасть его нама, ты возми Галичь, а яз Понизье, а Бог та поможеть; а про Черторыеск прав еси». Демьяну же приехавшу в великую суботу, наутрея же на велик день приехаста

Данил и Василько ко Черторыйску, в понеделник на ночь обьседоста град; тогда же и конь Данилов застрелен бысть с города; наутрея же обьехаста град, Мирослав и Демьян рекоста: «яко предал Бог врагы наша в руку ваю». Данил же повеле приступити ко граду, и взяша град их и князя их изъимаша. Потом же Мьстислав великый удатный князь умре: жадящю бо ему видити сына свого Данила Глеб же Зеремеевичь, убежен бысть завистью, не пустяше его, оному же хотящю поручити дом свой и дети в руце его: бе бо имея до него любовь велику во серце своемь. И потом же пустиста Ярослава и даста ему Перемиль и потом Межибожие.