Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Літопис про війну князів Мстиславичів з Ольговичами (1146-1148 pp.)

В лето 6654. Всеволод свкупи братью свою, Игоря, и Святослава же остави в Киеве, а со Игорем йде к Галичю, и с Давыдовичема, и с Володимиром, с Вячеславом Володимиричем, Изяслав и Ростислав Мьстиславичи сыновчя его, и Святослава поя сына своего, и Болеслава, Лядськаго князя, зятя своего, и Половце дикеи вси, и бысть многое множество вой идоша к Галичю на Володимирка; и бысть дожчь и стече снег, божиим промислом, и тако вдяху на колих и на санех [...] к [го]роду и пожгоша около его острг первый день, а вторый день створиша вече Звенигородьчи хотяче ся передати. И бе у них воевода Володимирь мужь Иван Халдеевичь, изома у них мужи 3 и уби я, и когождо их перетен на пол, поверже я из града; темь и загрози им. И начата ся Звенигородьци отголе бити без льсти. Видив же то Всеволод, нача доспевати, яко взяти город. В 3 же день приступиша вси вой ко граду, по зорям бишася до поздьное вечерне, и зажгоша город в трех местех; гражане же, божиею помощью, угасиша. Бог же и святая Богородица избави город от лютыя рати [...]

[...] Бысть же сступ месяца августа в 13 в день, в вторник. Игоря же по 4-х днех емше в болоте, приведоша к Изяславу, и посла и в манастырь на Выбобычь, и оковав и посла Переяславлю, и всади в поруб в манастырь святаго Иоана; и розграбиша Кияне с Изяславом домы дружины Игоревы и Всеволоже, и села, и скоты, взята именья много в домех и в манастырех. Святослав же вбежа в Чернигов с малом дружины, послася ко братома, рече Володимиру и Изяславу: «стоита ли, брата, у хресном целовании, се есми целовали пятом дни?» Она же реста: «стоиве». И рече им Святослав: «се вам оставливаю Кетяжка мужа свого, ачеть вам таи к собе» — а сам еха Курьску уставливать людий, и остуда Новугороду приде. И слышавше Половецьстии князи створившееся над Игорем, прислаша ко Изяславу мира просяче. [...]

Том же лете ходи Изяслав к Давыдовичема на снем, и рече има: «поидита на Олговича на Святослава»; и посла с нима сына своего Мьстислава, с Переяславчи и с Берендеи, рек им: «идите на нь, оже перед вами не выбегнеть, станьте же около его; аче вы ся струдите, а я пак чел приду к вам и стану около его, а вы домов пойдете» — и поидоша Новугороду [...]

В лето 6655. [...] Того же лета посла Володимир [и] Изяслав Давыдовича из Чернигова послы к Изяславу, князю Киевському, река: «брате! се заял Олговичь Святослав волость мою Вятиче, поидиве на нь; аже и проженеве, то поидеве на Дюрдев Суждаль, любо с ним мир створим, любо ся с ним бьем». Изяслав же Мьстиславичь сдума с Давыдовичема и с Всеволодичем Святославом поити на Дюрги и на Святослава. Тогда же Всеволодичь Святослав держаше у Изяслава Божьски и Мечибожие, Котелницю, а всих пять городов; и приеха к Изяславу, поча ся у негопросити река: «отче! Пусти мя Чернигову наперед, тамо ми жизнь вся, у брату моею у Володимира [и] у Изяслава хочю волости просити»; он же рече: «сыну! тако ти и гораздо, готов буди напереде; иди, доспей же на путь»; и поиде Святослав Чернигову. И сгадавше князи Черниговьскии, послаша к Изяславу, веляче ему поити, рекуче: «земля наша погибаеть, а ты не хощеши поити». Изяслав же созва бояры своя и всю дружину свою, Кияне, и рече им: «се есм с братьею своею сгадал, с Володимером и с Изяславом Давыдовичема и с Всеволодичем Святославом, хочем поити на Гюргя на стрья своего, и на Святослава к Суждалю, занеже приял ворога моего Святослава Олговича; а брат Ростислав тамо ся с нами соиметь, ать идет ко мне с Смолняны и с Новгородця». Кияне же слышавше, рекоша: «княже! не ходи с Ростиславом на стрья своего, лепле ся с ним улади, Олговичем веры не ими, ни с ними ходи в путь». Изяслав же рече им: «целовали ко мне хрест, а думу есми с ними думал, а всяко сего пути не хочю отложит; а вы доспевайте». Кияне же рекоша: «княже! ты ся на нас не гневай, не можем на Володимире племя рукы взнята; оня же Олговичь хотя и с детми». Изяслав же рече им: «а тот добр, кто по мне пойдет»; и то рек, свкупи множество вой и поиде. [...]