Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Літопис про міжусобні війни на Русі (1135-1136 pp.)

В лето 6643. Юрьи испроси у брата своего Ярополка Переяславль, а Ярополку дасть Суждаль и Ростов и прочюю волость свою, но не всю и про то заратишася Олговичи: йде Ярополк с братьею своею, и Юрьи, и Андрей на Всеволода на Одговича, и поимаша около города Чернигова села. Всеволод же не изиде противу биться, и еще бо бяху Половци не пришли к нему. Ярополк же постоя несколко дний у Чернигова, и взвратися в Киев и распусти вой, а со Всеволодом никакоже влади вся, ни мира с ним створив. И Половцем пришедшим к Всеволоду, Всеволод же с братью своею, и с Изяславом и Святополком Мьстиславичема, и поидоша воююче села и городы Переяславськой власти и люди секуще, доже и до Киева придоша и Городець зажгоша на святаго Андрея день, ездяху по оной стороне Днепра, люди емлюще, а другая секуще, не утягшим перевестися им, нелзе бо бяше перевестися крами; и пленища же и скота бещисленое множество. Ярополку бо бяше нелзе перевестисякрами с [вой] своими, а они, стоявше три дни за Городьцем в бору, идоша Чернигову и отгуде слюче межю собою створиша мир. И пакы Олговичи начаша просити у Ярополка: что ны отець держал при вашем отци, того же и мы хочем; аже не вдасть, то не жалуйте что ся удееть, то вы виновати, то на вас буди кровь. То же все ся створи, оже выгна Дюрди Всеволода ис Переяславля, а потом Изяслава выгна Вячьслав, а потом Изяслава же выгна тот же Вячьслав ис Турова, а они приступиша к Олговичем, и бысть в том межи има пря велика злоба, идяху, слово рекуче, Олговичи: «яко вы начали есте перво нас губити».

Toe же зимы совкупи вой Киевскии, а Дюрди Переяславци, и стояша 50 дний у Киева, и вмирися Ярополк с Всеволодлм; и даша Переяславль Андрееви брату своему, а Володимерь Изяславу Мьстиславичю.

В лето 6644. Привед Ярополк брата своего Андрея из Володимеря и да ему Переяславль, а Изяславу, сыновьцю своему, Володимерь.

Того же лета приде Всеволод, с всею братьею, к Переяславлю, и стояше под городом три дни, и бишася у епископлих ворот и в княжих ворот, и почютиша Ярополка йдуча, идоша наверх Супоя, и ту пристроившася дождаша их. И вскоре Ярополк с дружиною своею и с братьею, ни вой своих сждавше, ни нарядившеся гораздо, устремишася боеви, мняще, яко не стояти Олговичем противу нашей силе; и бывшю сступлению обеима полкома, и бишася крепко, но воскоре побегоша Половци Олгове, и погнаша по них Володимерича дружина лутшая, а князи их Володимеричи бьяхуся со Олговичи. Тогда же Василко Леоновичь царевичь убьен бысть, и бысть брань люта, и мнози от обоих падаху. Видивше же братья вся, Ярополк, Вячеслав, Гюргий и Андрей, полкы своя взмятены, отъехавша всвояси. Тысячкый же с бояры их переже гнаша во Половцех, избиша е и воротишася опять на полчище, и не обретоша княжьи своея, и упадоша Олговичем в руце и, тако изъимаша е, держаще стяг Ярополчь, яша бояр много: Давыда Ярославича тысяцьскаго, и Станислава Доброго Тудковича, и прочих мужий; и внук Володимерь Василко Маричичь убьен бысть ту: многы бо бяше бояре Киевськии изоимали. Ярополк же, с братьею своею, приде Кыеву. Се же сдеяся месаца августа в 8 день. Андрей узратися у Переяславль, Всеволод же перешед Десну ста противу Вышегород с вой, Ярополк же нача свкупляти вое на нь; и постоя Всеволод за 7 дни, иде Чернигову, и слэша межи собою послы, и не могоша ся уладити. Паки же Олговичи с Половци переидоша Днепр, декабря в 29, и почаша воевати от Трьполя, около Красна и Васильева и до Белогорода, олиже до Киева и по Желане и до Вышьгорода и до Дерев, и чрез Лыбедь стреляхуся. Ярополк же бяше сбрал множьство вой на нь изо всих земль, и прием расмотрение в сердци, не изиде на нь противу, ни створи кровопролитья; но убоявся суда божия, створися мний в них, хулу и укор прия на се от братье своея и от всих, по рекшему: любите враги ваша. И створи с ними мир в 12 генваря, и целовавше хрест межю собою, ходячю межи ими честьному Михаилу митрополиту со крестом, и вда Ярополк Олговичам отчину свою, чего и хотели; и тако утиши благоумный князь Ярополк брань ту лютую. [...]