Наскрізний зріз української історії від найдавніших часів до сьогодення

Універсал Івана Мазепи про захист прав козелецького шевського цеху (не раніше 1700 p., травня 6)

Ознаймуем сим нашим уневерсалом пану полковнику киевскому, сотникови козелецкому з товариством, войтови зо всем майстратом и всем обивателем и гіосполитству тамошнему, видячи право цеху шевского козелецкого от старих веков и от антецессоров наших наданное, перед нами покладаное и ухваливши оное, ствержаем сим нашим уневерсалом слово в слово выписавши, позволилисмо аби ведлуг оного справовалися таким способом, брата з межи себе обрати за цехмистира, кого они улюблят, и оного цехмистра повини они слухат, як на старшого их належит, а если би котории шевчик вендревний, пришедший до местаКозелца неоповедне, без позволеня цехмистровского, в якого товариша робити мел, за такую дознаную вину повинен дати до скринки братской цеховой тое що братия ухвалит, и хтоби колвек повинен братии их хотел цёх поєднати и робити з товаришами ровно, тот повинен цехмистру и брате годит на чем может поєднати, толко до скринки братской повинен копу дати литов[скую], опроч воску церкви Божой належачого, и уконтентованя брати, и сотникови на тот час зостаючому пол золотого звичайного дати повинен, а вшелякого брата цеху того шевского их непослушнего они[й] повиненний ведлуг стародавних своих звичаев и права карати винуго, якося в таком праве описано и во всем ведлуг давних своих порядков справоватися им позволяем, показавши над ними всеми лист тот наш, от подвод уволняючим, аби о том добро знаючи, пан полковник киевский, сотник козелецкий, войт тамошний со всеми обивателями не важилися у жадного брата цеху шевского подвод брати и их болш утяжати, тое приказуєм, аби в том нихто воле нашей не спротивлялися и на тое казалисмо видать сей наш уневерсал из канцелярии поважной присяжности войсковой [з] подписом руки нашой. [...]