Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Універсал Михайла Ханенка в Ніжинський полк із закликом вирушити на Чигирин проти гетьмана Петра Дорошенка (1672 p., травня 9)

Всему старшому и меншому Войска его царского пресветлого [величества Запороз]кого, по тот бок Днепра знайдуючомуся товариству, особ[ливе их милостем панам] полковникови нежинскому,асаулом, сотником, атаманом и всем [як войсковым, так и по]сполитым ратным, и покуй святый в христыянстве правдыве [милым того полку оби]вателям братеи моей доброго от Господа Бога здоровя [желаем вашим милостям] од яких часов мое есть з Войском его королевской милости Запорозким [и с Низу в городы прийдучим], ведаю, же давно ваша милость братия моя, голосные о [том по поведениях] наших маете у себе вести. Леч же замыслов чиих же колвек [яко] жаден з смертелных знати не может, для того що за интенцыя [выхода] в городы моего причина, не барзо давним часом при щиром моем братиком отозвании его] милости пану Забеле, обозному Войск его царского пресветл[ого величества Запо]розких енералному, а наказному гетманови, досит ретелне и достаточно], где як тот лист мой, так и копей з листов Дорошенкових до [шайтан]ской о посылки противко християнству, пысаных тому ж пану Забеле, от мене [посланних], певне розумею, же не суть утаены перед в. милостямы, толко на тое не мней уболеваю [...]шу, же за иншимы многимы войсковыми забавами ораз и до в. милостей всех брате [и моей] мелой, тогдеж не одозвалемся, а толи и тепер еще не упилненый, и овшем найпогоднейший до зеднаня собе христианской и братерской у в. милостей любви час выдячи, коли король его милост, пан мой милостивый, с правдивым монархию христианским, з его царским пресветлым величеством вечный замкнувши покой, якобы единокупними своимы наступивши на неприятеля креста святого сылами з помочу ,Божею подвигнули Церков святую, а затамовавши кров христианскую,невинне од килдесять лет лыючуюся, иж звязаных в неволе тяжкой басурманской христиане арканы скинуты могли, таковую едну мисл и раду перед себе взяли, тепер хоч позно пишу до в. милостей братьи моей и тое ознаймую, же я, уховай Боже, не для уряду гетманства и жадного сеч светнего зыску, але для щекгулного з неволничой праве бесурманской протекции народу христианского освобоженя, в которую доброволне всех нас Дорошенко для своего гетманства отдаты усыловал. Статеч[но при е]го милости пане моем милостивом дедычном христыянском монарсе держуся [и умирати]пры нем за достоенство найяснейшего его маєстату, вин на себе и готова [быти] сужу, до которой моей и всего Войска Запорозкого милой и здоровой отчиз[ни] зо всем народом православно христианским о висвобожене его з неналежного турского подданства завзятости, яко тут полки некоторие, а особливе Уманский, [побил] вперед серденят у себе, Торговицкий, Браславский и Подолский, охоче скло[нилися] и иншие все городы и полки того ж собе желают, тылко за старшиною [своею при]йти до того не могут. Так и в. милость, братья моя, борзей еще не [имея] к тому доброму и пожиточному делу жадной не от кого перепони, [веда]ючи, же и ободва христианские монархове наше, его царское пресветлое величество и король его милость пан мой милостивый братерско згодилися и юж [про]мышлевают бридкого бесурманина [до] упадку, жебысте не иначей, тилко так, [як] монархове нашы промежку собою братерско и згодне з наме жыли, а една[кож о] подвигнение Церквей Божих и всяких месц святых запустилых и в попеле през войны оберненних, и о высвобожение здавна и в нынешных часех для нещасливого уряду гетманства через Дорошенка, не тилко з сего боку Днепра, але и з вашей стороны без лечбы в тяжкую татарскую и турецкую неволю отданых невинных душ христианских, сполне з нами лежачи старане свое теж не мней вчасне забегаючи целости сколко сыл помочи и способове подати рачить Господь Бог, жебысте в. милость братья моя з своей стороны отважне наЧигирин наступовали и неусыпный около неприятеля нашого, назвыском тылко християнина, але поступком злым и шкодливым отчизне, ровного опекунови своему, которий для задержаня себе на гетманстве з душею и с телом себе и невинний народ православный российский запродал, Дорошенка, завчасу рицерский хотели чинити промысл. Велце о тое милостей ваших прошу, тут зас з стороны нашой юж есть певный и з уставичным налогом промысл, бо чуючи великой быти потуги з везиром турецким по сюм боце юж Дуная, любо и так силние маю, опроч запорозких и городовых, коронние при собе войска по старому, и сам король его милость, пан мой милостивий, для отпору тому по неприятелеви вырушити не поленился, и юж простует ку Камянцу. О чом всем знаючи, в. милость, братея моя, жебысте яко могучи, налегали на Чегирин, и повторе о тое велце просячи, по християнску везвавши братерскую згоду милостей ваших, [яко теж згода] будет протывко жаданю моему, найпрудший миле [уг]ля[даю ответ], щирую мою в. милостем оферную жычливость и таковой [же предався] оных приязны зостаю завше.