Наскрізний зріз української історії від найдавніших часів до сьогодення

Інструкція Петра Дорошенка послам Війська Запорозького на коронний сейм, спрямована на захист православної віри (1670 p., жовтень)

Греческая руская старожитная вера тая и такая, з якою старожитная Русь до Короны Полской приступила, абы при своих свободах и правах и водном уживаню набоженства зоставала, поки языкнароду руского засягает во всяких местах, местечках и селах, так в Короне Полской, яко и в Великом князстве Литовском, также на сеймах, в войсках, на трибуналах, не толко в церквах, алепублично в процессиях в навижаню хорых, в причащаню святых тайн, хованю умерлых и во всем згода так, яко набоженства своего станы веры римское волно и публице заживают, кгрунтовного потреба постановленя.

Той же веры греческой маеть быти моц дана водного становления и фундованя церквей, монастыров новых, яко и старых, поправованя. А що ся тычет церквей, монастыров и добр, здавна на церкви веры греческой руской старожитной фундованых, при тых мают зоставати не унияты, але веры православно-греческой Русь. Который церкви, монастыре, епископии, архимандрии, игуменства и иншие власти со всеми до них надежными добрами от унеятов отобраны и до владения православным поданы будут повинны. Унея зась, которая есть противна веры греческой православно-руской, и котораянезгоду межи полским и руским православным народом множит, жадным обычаем потом обновлятися абы не могла, и всяких церквей, монастыров, фундушов на унею фундовати, будовати и розширятися,так в добрах его королевской милости, яко и в дедичных духовных и свецких сенаторских и шляхты всякое станов нигде не допущено было.

Также панове дедичные, державцы и их урядникове веры римское над духовными нашими свецкими и законниками веры православно-руской не унеятцкой жадное юриздикции мети не повинны, опрочьналежного им руской православной веры пастыра. [...]

Метрополиту киевского абы того, которого все духовный и свецкии руского православного украинского народу станы з гетманом и Войском

Запорозким волною елекциею оберут, пастырем потвержено. Иншого зась такого, на которого Войско Запорозкое и все станы православно-росийскии украинные не изволяют, жадным обычаем на катедру митрополии киевской жебы не натручано и за границею украинскою зватися метрополитом киевским никому не допущано, послове наши умовлятися повинны.

Святая Софея, церковь катедралная, яко иншии все церкви и монастыре так в Киеве, яко и по инших местцах будучие, абы подлуг старожитных справ в своих всих, до себе каждой церкви и монастырови надежных добрах и кгрунтах, без жадного нарушеня и не от кого уймы, вси монастыре и церкви Божии зоставали, варовати надобно. Особливе монастыр Печерский Киевскй абы, подлуг давных привилеюв королей их милостей и князей руских, ненарушне зоставал, просим.

Преизревшися в книзе прошлое конфедерации, в которой не бывали никгды, з жадной такой обрады два пункта противные и шкодливые веры нашой православой кгреко-руской, не унетцкой, а все злое броити унетом и покой посполитый взрушати, церкви, монастыре, и бенефиция церковные кгвалтовне одеймовати позволяючые: кгды в першом пункте оборону костела римского варовавши, и той придаток и обряд кгрецкое унеятов церкви. А на другом местцу, под титулом религеи кгрецкой, другий довод не кгвалтячи правами владицтва Премысского и архимандрией Лещинской в повете Пинском, и где колвек были бы церкви унеятов втручоные найшовши, жадным обычаем покою сталого сподеватися не можем: бо абы тыи субъекта униции наложившися, завжды права королями их милостями Русе православной даныи и повагою целого зъезду Речи Посполитое апробованыи, взрушати тепер за таким о своей своеволе написаным правом мели, церквам и духовным нашим дати покой намней не дуфаем.

Для того ж, якосмо до всей Речи Посполитой о знесенье подлуг першой коммисии Гадяцкой, той колотне унецкой, з которой все злое походит, суплековали на сейм коронацией его короля милости и Речи Посполитой инструкциею нашею, посилаючи кучыли, так и теперь тыи вышпомененныи обидва о них втрученыи пункта з конфедерацией прошлой, абы албо были цале вымазаны и выкинены, албо на теперешном, даст Бог, сейме конституциею знесеныи и напотом в книги прав жадной взасенки о руской унеи абыся писати не важено, але едной Русе неунецкой права давныи и теперешныи аппробацииваровано, домовлятися, и ассекурацию варованую его королевской милости и Речи Посполитой на скасованье тых унетов в конфедерацию втрученых неслушне прав послове наши одержати старатимутся. А без того варунку до кгрунтовного покою приступити не будет снадно.

Достоенства всякие духовные, в вакованье приходячие, то есть, метрополия, епископии, архимандрии: Печерская, Виленская, Городенская, Жидичинская, Лещинская, Полоцкая, Мстиславская, Супралская, Дерманская, Дубенская, Черейская, Уневская, Слуцкая и иншие монастыре, мужеского и женского законов, в добрах королевских и дедичных все в Короне и Великом князстве Литовском будучие, абы, опрочь водное елекцыи, без жадного на урожене шляхецкое, або иншое, респекту некому не были даваны, толко подлуг, канонов святых отцов годному, и залецене од его милости отца метрополиты православного киевского маючому чоловеку. А метрополиту после елекцией, сакрою от святейшого патриархи константинополского утверженому, абы от короля его милостине даваны были, що жебы вечным правом, в конституцию вписаным, постановлено было, коммысаре наши, нашим всего Войска Запорозкого и народу руского именем, упоминатися должны будут. [...]