Наскрізний зріз української історії від найдавніших часів до сьогодення

Універсал Павла Тетері про розміри та порядок стягнення мита (1666 p., грудня 8)

Ознаймую сим моим писанием кождому, кому о том ведат надлежит, меновите ексактером нашим на сей час и напотом будучим, яко за антецессоров моих бывало, так и за уряду моего нехай будет, абы ексакторове войсковие от купцов чужоземских, то есть греков, армян и турков до скарбу войскового выбырали от сорока соболей золотих шесть, и от сорока пупков соболих золотих два, и от сорока куниц золотих два, от бунта лисиц золотих два, а от инших товаров московских от ста талярей бытих по золотих пяти, знову от товаров турецких, яко то от едвабов, коберцов, килимов, завоев, поясов, мусулбесов, киндяков и инних дробних и разних товаров от ста талеров левкових два бытих, а от кипи габи полевку, а хто бы з нашои з земле золото, серебро, камене дорогое, перла випроважал, мает от ста талеров по золотих пяти давать, если ж бы теж кто с чужой земле, так з духовних особ, яко и свецких людей, в яких колвек потребе купцов мел, теды ексакторове наши мают, сумненыем обовязавши, звичайную брати ексакцию, а кади бы купец який наш товари купца чужоземского за свои удаючи, за границу випроважовал, таковаго зо всем кажем забрати, с которого товару половица до скарбу войскового, а половица ексакторам нашим надлежат мает. При том приказуємо, аби ексакторове над уставу болше не брали ничего и купци аби ексакции отдават не збороняли.