Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

З універсалу Юрія Хмельницького козакам і всім жителям Прилуцького полку із запевненням їх у тому, що слід підкоритися польському королю (1660 p., листопада 18)

[...] Дошло нам ведати, же вы все, заднепряне, чили моим молодым не доверяючи летам, чили яко бым то з якого учинил примусу, иж его корол. милости и Речи Посполитой з Войском Запорозким в верное покорылся подданство, не хочете з нами едностайне и едыномыслне прирожоному своєму голдовати пану, а своим упором прагнете кровопролитна христианского, которое певне, скоро Днепр станет (бо зараз все войска коронние, татарские з всеми потугами и наши козацкие яко на спротивных на Заднепре пойдут), мусит быти. Якого мы не зычачи, ласкавым вас отцевским упоминаем серцем, жебысте, поглядаючи, як ся Пушкарюм и иншим бунтовником и их помочником з Божого допущена за своеволю нагородило, так же постерегаючи здоровя своего, жон и деток и целосты маетков своих и волностий, крваве набытых, бунтов не вщинаючи и своеволе попереставши, под высокую отцевскую его корол. милости [руку] наклонили, от которого кгды бысмо не были упевнени, же Церковь Божиа православная наша при целости, повазе и волностях своих будет зоставати и насилия жадного терпети не будем, волели бысмо все кровю нашею облити местце, на котором потреба была, а нежели бысмо ся склонили до подданства его корол. милости; але кгды-смо зрозумели, же той мир и постановене будет кгрунтовное и вечное, а до того, же и его царское величество, завевшися з его корол. милостю, немало ратных своих людей потратил, и як великие московские зШереметом, з Хованским, з Долгоруким и иншими были войска, силам еднак коронных войск вытрвати не могучи, до остатней пришли згубы, и межи нашим народом великое пролитие крове сталося.Зачим и повторе вас упоминаем, жебысте всех бунтов поперестали и универсалом [...] Сомка и бегуна Бруховецкого, змышленым на имя наше, не верыли. [...]