Ваша електронна бібліотека

По історії України та всесвітній історії

Наскрізний зріз української історії від найдавніших часів до сьогодення

Універсал Богдана Хмельницького Остафію Стоматаєнку на збирання податків з іноземних купців (1654 p., квітня 28/травня 8)

Ознаимуем сим нашим писанием кому-колвек в том ведати надлежит, меновите старшине и черне Войска нашего Запорожского, также купцам чужоземским и вшелякои кондиции людем, кому толко сие наше писание оказано будет, иж мы, маючи великии розход на людей чужоземскых, а приходов мало маючи на тые росходы, прето оглядевши тое, як здавна перед тим бывало далисмо екзакцию скарбовую од купцов чужоземскых, то ест от греков, ормянов и турков, Естафиеви Стаматиенкови, которую повинен вибирати и отдавати до скарбу нашего войскового; од сорока соболей золотых шисть, од сорока пупков соболих золотых два, од сорока куниц зол[отых] два, од бунта лисиц золотых два, од инших товаров московских од ста таляров битых — зол[отых] по пять, знову од товаров турецких, яко то: од едвабов, коберцов, килимов, завоев, поясов, мусулбесов, киндяков и иншых дробных и розных товаров — од ста таляров полевковых два битых, од кождои кипи габы по леву; также хто бы провадил з земли нашои золото, сребро, камене дорогое, перла и од тых товаров од ста таляров — по зол[отых] пять, ежели бы теж хто в чужой земле, так з духовных особ, яко и свецких людей в яких-колвек потребах под протестом поселским ехал и при собе купцов мел, теди обязавши оных под сумленнем, дозорца наш и од тых, которые при послах в своей купецкой ишлы б справе, мает екзакцию належную брать. Кгды бы наш який купец мел именем своим з товарами чужоземного купца знашой земле выпроваживают и досведчил бы ся дозорца наш, теды позволяем ему той увесь товар забрать; з которого товару ему половицу, а до скарбу войскового половицу належит. [...]