Наскрізний зріз української історії від найдавніших часів до сьогодення

Наказ Богдана Хмельницького ніжинському полковнику Прокопу Шумейку не перешкоджати шляхті повертатися до своїх маєтків (1650 p., липня 31/серпня 10)

Пану Шумейкови, будучому полковникови нижинскому, тым писаньем нашим ганим, иж не ведлуг рады и постановеня нашего за Орсклом выправуючи войска на Черкасы, [а] приехавши до полкуНежинского неслушные поступки ваши чего смы и в раде не споминали, яко бы я сам гетман мев казать карать ляхов и урядников, шляхту, так на Украине, яко и у Северу выбивать. Естем казал, абы все товариство, яко звычаи войсковым, на каждый час в делах рыцерских, так в оружю, конех, живности готовыми были, а жебы не были так от ляхов, яко ни откуль беспечными, а зарывки жадной ни с ким не казалисмо чинить. Волно уже в миру и шляхте до своих маетностей и старостве приезжать, а меновите о того его м[илостивого] пана Лаврентия Лысковского, посланного от его м[илости] пана краковского, яко гетмана великого коронного пилновать наупоминаем и сурово росказуем, абысте так ему самому, яко и иншим жадной кривды и перешкоди в пожитках панских чинить не важился, с чего бы покои не мог быть разрушоныи. Каждый нехай из свого ся тешит: козак нехай свого глядит и своих волностеи постерегает, а до тых, которы не суть приняты до реестру нашего, абы далы покои и в засевках, которые на ланах панских збоже лета военного позасевали, знявши збоже, тепер нивье поотдавали; а которое збоже по примирью сего лета на ланах панских сеяли ярину, абы десятую копу дали; бо уже по примирью не годилося того чинить, досыть бы тешитися ласкою Божиею и войсковою, що до волностеи своих принялисмо, а же бы толко при своем добром зоставать, иначей абысте не чинили под срокгим каранем своим войсковым. [...]