Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

З універсалу Богдана Хмельницького до населення України із закликом об’єднатися з ним для збройного захисту своїх прав (1648 p., травня 28)

Зиновий Богдан Хмельницкий, гетман славного войска реєстрового Запорожского и всее по обеим сторонам Днепра сущей Украины Малороссийской, вам всим Малороссийским по обеим сторонам реки Днепра шляхетным и посполитим, большого и меншого чина людем, а особливо шляхетноурожоным козакам, истой братии нашей, сим универсалом нашим ознаймуем, иж не без причин наших слушныхмусили есьмо зачати войну и поднята оружие наше на Поляков, через которое що ся, при всесильной помощи божеской, на Жовтой-воде апреля 8 а потом под Каменцем мая 16 над ними Поляками стало, и то всем вам уже совершенно есть видомо.

Тепер же, по двоих оных над Поляками неровных битвах наших, скоро получили ведомо, же они тым несчастием своим розгневаны и розъярены будучи, не только сами панове и княжата около Вислы и за Вислою многие на нас стягают и совокупляют войски, але и самого найяснейшого короля своего Владислава, пана нашего милостивого и отца ласкавого, на нас подмовляют и возбуждают, абы со всими силами своими пришедши в Украину нашу Малороссийскую, латво нас огнем и мечем завоевали, и мешканя наши сплюндровавши, розорити и в прах и пепел обернута, а самых нас выбита, других же в немилосердную неволю забрати и на иншии далечайшии за Вислою места выпровадивши, славу нашу не только к части света Европейского православленую, но и в одлеглых за морем Чорным странах Азиатских довольно народам тамошным ведомую, испразднити и поглотити, постановили есьмо в намерении нашом не против короля, пана нашого милостивого, но против Поляков гордых, занизащо маючих его королевские высокоповажные привилегии, нам козакам и всим обче Малоросиянам данные права и вольности наши древние при нас заховуючи и укрепляючи, мужественным и небоязненным, при помочи Божией, станути сердцем и оружием.

Для того, притягнувши от Каменецка и станувши обозом нашим войсковым тут под Белою-церквою, пишем до вас сей универсал, через который зазываем вас всих Малоросиян, братию нашу, к нам до компании военной. [...]

А що мы нынешнюю с поляками зачали войну без ведома и совета вашого всенародного, за тое вы на нас не ускаржайтеся: гдыж мы учинили так для лепшои пользы вашой и нашои, научившисяосторожности и лучшего воинского управления с прикладу прежних братий наших, под Кумейками и на устьи реки Тясьминя с поляками недавне-прошлых времен войну имевших; которые поневаж прежде войны своей универсалами своими, до вас во всю Украину заслаными, уведомили поляков о своем противном им намерении, тогды тым уведомлением перестереженные поляки, яко належало запобигги злу своему приготовились и на побеждение их войск козацких приспособились.

А мы, памятуючи такие несчастливые случаи, удержалися мов аж по сие время с сим универсалом, о начатом с поляками делу военном уведомлением нашим. А теперь, як видите, вам всим обще малороссиянам о том доносим, так и до компании военной на предлежащее с нимиж поляками дело военное вас вызываем и заохочуєм. .

Кому мила вера благочестивая, от поляков на унию претворенная, кому из вас любима целость отчизны вашей — Украины Малороссийской и честь ваша шляхетская, от поляков уничтожаемая, весьма посмеваемая, попираемая и поругаемая, тот всяк, не яко выродок, но яко зычливый и любезный сын отчизны своей, по выслушанию сего универсального ознайменя нашого, рачи к нам в обоз, под Белую-церков, на добрых конех и с исправным оружием неоткладне прибувати, и сполне с нами, прикладом старовечных валечных и многим народам в околичных странах славных предков своих, стануты мужественно и небоязненно, при всемогущей помощи Божией, против поляков, своих грабителей, озлобителей и супостатов.