Ваша електронна бібліотека

По історії України та всесвітній історії

Наскрізний зріз української історії від найдавніших часів до сьогодення

З листа польського короля Сигізмуцца III луцьким урядникам і міщанам про заборону будувати братську церкву і школу (1620 р.)

[...] Славетные, верне нам милые! Дано нам справу, иж найдуютсе межи вами некоторые особы; которые, выламуючисе з юрыздиции владыки луцкого, на зневагу его, без жадного позволения его, яко пастера там того местца и старшого преложоного релии кгрецкое, и овшем упорне и свовольне церковь и школу якуюсь новую, называючи то Брацтвом милосердя, в том же месте нашом Луцку заложили. Которым заложенем тое церкви унию, през антецесоров помененого велебного отца владыки луцкого, за позволенем всего духовенства, в том панстве нашом будучого, принятую и до панств наших святобливе внесеную, а за тым зверхность пастырскую помененого отца владыки луцкого, за сполную на то радою и помочю вашою, затлумити усилуют. Што иж се диет мимо ведомость нашу, на уйму юриздиций помененого владыки луцкого, противко правом и вшелякой слушности, на знесене тое светобливое едности, про то мы, зичечи, абы в местах наших ничого за приватными чиими замыслами, без ведомости и позволеня нашого, се не деяло, хотечи, абы тая справа, которая есть владзы и зверхности пастыра тамтого местца уближаючая и вшелякой слушности противная, далей се не ширила. Росказуемо конечне, как мети хотечи, абысте таким свовольным юрыздициом, которые не могут быти, одно з великим помешанем и уближенем юрыздиций нашое и помененого велебного отца владыки луцкого, множитисе не допусчали, и ремесников местским под срокгим каранем нашим будованья тамтое церкви и школы занехати росказали. [...]