Ваша електронна бібліотека

По історії України та всесвітній історії

Наскрізний зріз української історії від найдавніших часів до сьогодення

З послання Івана Вишенського до вищого українського духовенства (кінець XVI ст.)

Покажите ми убо, о згоду вяжучии, где который з вас первый степень сам собою выполнил и в вере, основаной в непорушенном фундаменте, со исполнеными заповедми ся знашол? Не ваши милости ли веру делы злыми наперед еще разорили? Не ваши милости ли прагненя лихоимства пенежного и достатку мирского жерело похотий в собе роспустили и насытится никакож не можете и еще болшею алчбою и жаждою, свецких достатков прагнучи, оболели есте? Покажете ж ми, о згоду вяжучии, где который з вас, в мирском житии будучи, оных шест заповедей, от Христа узаконеных, сам собою исполнил, то ест алчных прекормил, жаждных напоил, странных упокоил, нагих одеял, болных послужил, в темницах навежал? Не ваши милости ли тых шест заповедей не толко в мирском чину разорили есте, але и ныне, в мнемаючемся духовном, непрестанно разоряете?

Не ваши милости ли алчных оголодневаете и жаждными чините бедных подданых, той же образ Божий, што и вы, носячих; на сироты церковные и прекормлене их от благочестивых христиан наданых лупите и з гумна стоги и обороги волочите; сами и з своими слуговинами ся прекормлюете, оных труд и пот кревавый, лежачи и седячи, смеючися и граючи, пожираете, горелки препущаные курите, пиво трояковыборное варите и в пропаст несытнаго чрева вливаете; сами и з гостми ся своими пресыщаете, а сироты церковные алчут и жаждут, а подданые бедные в своей неволи рочнего обходу удовлети не могут, з детми ся стекают, оброку собе уймуют, боячися, да им хлеба до пришлого урожаю дотягнет. [...]

[...] Не ваши милости ли в темницах за правду затворяете и беды людем христианским терпети єднаєте? Не ваши милости ли и Никифора добре посетили и в темницу затворит исходотаили есте, яко да со лжею беспечне пануете и обличениа на свое отступление со папою своим от оного уст не относите? Але так ведайте, если и язык человечий умолкнет, але зрител видит от горе долних, и узрите все свое нынешнее тогда, егда, таинство жизни сея выполнивши, в страну будущаго века отидете [...]

Покажете ми, о згоду вяжучии, где который з вас оставил дом, села, имения, маетност, сородство и мирское житие господа ради. Не ваши милости ли того ради и бискупства ся докопали, яко да сокровище болшее именей, маетност, скарбов пеняжных и прибытков в церкви Божой знайдете, слуг личбою двояко и трояко, нежли перво есте мели, умножите; славою века сего коронуєтеся, в достатках безпечалных и роскошных, як в масле, плываете, дочки богатым веном бискупским обвенуете, зятей панами пышногордшими почините и своих повинных церковным, сиротским, убозским и следа Христова держачихся добром обогатели есте, титулы им славнейшие у света сего починили есте, от войских на подкоморих, от подкоморих на судей, от судей на каштеляны, от каштелянов на старосты, от старост на воеводы переворочаете?