Наскрізний зріз української історії від найдавніших часів до сьогодення

III Статут Великого князівства Литовського про статус підкоморних (1588 р.)

РОЗДЕЛ ДЕВЯТЫЙ

О ПОДКОМОРЫХ В ПОВЕТЕ И О ПРАВАХ ЗЕМЛЕНЫХ, О ГРАНИЦАХ И О МЕЖАХ

АРТЫКУЛ 1

О у становленью подкоморых в поветех и о прысязе их

Уставуем, иж в кождом повете маеть быти подкоморый присяглый и оселый в повете том, также и в земли жомоитской. Вед же того вряду подкоморства иначей давати не маем, одно за обраньем на то певных особ чотырех через обывателей кождое земли и повету тым порядком, яко обиранья иншых врядников судовых: земских, судьи, подсудка и писара ест в сем статуте описано. А с тых особ обраных и нам от станов поданых кого се нам непрыстойней видети будеть, того мы, Господар, з верхности нашое господарское, на тот вряд преложим и привильем нашим его потвердим до живота его або до подвышенья на иньший який болший вряд або достоеньство. А первей, нижли тым урядом подкоморским справовати будеть, маеть прысягу на тот вряд свой на першых рокох судовых земских, перед врядом судовым земским и перед всими иными станы, так на роки прыбылыми вчинити [...]

АРТЫКУЛ 2

О повинности и владзы вряду подкоморского

Во всих розницах земляных и граничных за отосланьем от суду земского або юродского мають подкоморые моцью зверхности нашое и владзы уряду своего давати позвы по стороны под именем и печатью своею и с подписю руки своее и за тыми позвы своими от поданья их, так очевистого, яко заочного рок завитый на выезд на кгрунт складати за шесть недель о всякие розницы земленые и иные входы пожитки. Которые ж позвы подкоморого мають трвати от взятья их до поданья албо положенья стороне толко через год. А хто, позвы взявши, до году ими не позоветь, тот потом иншые позвы отновити и взяти маеть. А за позвы выехавши подкоморый на кгрунт пенный и огледавшы довод права листов, и знаков граничных, и светков, чые листы лепшые, и знаки граничные певнейшые, и светки слушнейшые, тую сторону мает ку доводу припустити и, выслухавшы доводу, водле статуту маеть кгрунт пенный и границы сказати, копцы и знаки граничные учинетъ. А хто в кгрунте винен зостанеть, тот кгвалт платити повинен; а невезки всякого стану и головщызны людей простых, также шкоды вси за доводом слушным правным заразом там же на кгрунте, не откладаючы того на иншый час и до иншого суду, сказати и на то все лист свой судовый под печатью своею и с подписом руки своее дати. [...] А где бы з обеюх сторон выводу правного на письме або теж и знаков граничных явных, слушных не было, толко бы светки ставили, тогды поводовая сторона при жалобе своей маеть ку доводу прыпущона, то ест ку светкам, веры годным и ку прысязе их и самого жалобника [...]

АРТЫКУЛ 11

О том, где бы в кгрунте земленом от самого подкоморного кривда кому деяласе або ему от кого

Паклиж бы кому от самого подкоморого албо подкоморому от кого иного кривда в кгрунте деяла се, таковый укривжоный мает сторону свою противную, водлуг науки и описанья сего статуту, до вряду належного позвати. А там, на вряде, с права прыйдет ли до того же выезду на землю не потреба будеть, тогды в таковой речы мають з уряду судового земского две особы судья с подсудком. А естли бы тые оба два быти не могли, тогды з одным з них, которым писар земский на тот кгрунт пенный выехати, и то промежку сторон водлуг права розсудком своим скончыти. А рок такому выезду, если се такая справа у суду земского точыти будеть, маеть быти очывисте сторонам зложон завитый, по доконаныо роков земских в чотырох неделях. А естли такая реч с подкоморым отослана будеть на кгрунт от суду кгродского, тогды сторона поводовая маеть свою противную сторону позвом тых двух врядников судовых, земских, которые там поспети выехати будуть, такеж, яко и подкоморого позвом на шесть недель и на рок завитый позвати. А если бы зима зашла, же бы перед снегом граничит се не могло, тогды рок за позвы и очывисте маеть быти складай по збеженью снегу водлуг уваженья часу слушный и прыстойный. [...]