Наскрізний зріз української історії від найдавніших часів до сьогодення

Привілей Сигізмунда Августа київським міщанам на право обрання війта (1570 p., травня 28)

[...] Иж мещане места нашого Киевского, постановившися обличне перед нами, господарем, преложили перед нами: иж што водлуг стародавного звычаю за продков наших, славное памети светлое, королей Польских и великих князей Литовских, и теж за щастливого панованья нашого таковую вольность мели, сами межи собою с посродку себе мещан Киевских войта собе обирали, который за обираньемь их, а потверженьем нашим завжды в том месте нашом Киевском будучи, водлуг права их Майдеборского, наданого им с продков наших и з ласки нашое им потвержоного, ими мешаны Киевскими справовал, судил и рядил; на што показывали перед нами листы наши господарские с подписаньем руки нашое господарское, которыми листы нашими, за обираньем и ознайменьем а прозбою их, войтове им от нас были потверживаны; и хотечи они зостати при таковой волности своей и на потомные часы, просили нас покорне, абыхмо им в том ласку и прихилность нашу господарскую показали, а при той вольности, которое они з давных часов за продков наших и теж за щастливого панованья нашого уживали, з ласки нашое королевское, зоставили и заховали. Мы тогды видечи быть того речь слушную, звлаща бачачи то, иж они тое вольности так за продков наших, яко за щастливого панованья нашого, во вживанью были, прозбе их ласкаве ся прихиливши, тое место наше Киевское и всих мещан тамошних Киевских, на тот час будучих и напотом пришлых, способу веры Латинское, Греческое и Ормяньское наследовцом, з особливое ласки и щодробливости нашое королевское, при той преречоной вольности их зоставуемы, заховываемы, позволямы, привлащамы и даемы на веки, так, иж тые мещане наши Киевские, водлуг стародавного звычаю и вольности своей,мають и будуть мети таковую моць и вольность нинейшого часу и напотом пришлого сами межи собою с посродку себе мещань Киевских, которые под правом Майдеборским седять, водлуг воли и подобанья своего, войта собе обрати мають [...]