Ваша електронна бібліотека

По історії України та всесвітній історії

Наскрізний зріз української історії від найдавніших часів до сьогодення

Листи до земян Волинської землі з наказом виступити «конно и збройно» на земську службу (1562, квітня 15-18)

[...] Ведомо вам, иж з воли а ласки Божеи седши есьмо на столце предков дедичных наших г(о)с(по)д(а)рств з по весь час, з милосердя его светого, за щастливого панованья нашого, завждыесьмо воли его насветшое наслядуючи а зо всими околичными паньствы кровопролитья постерегаючи, вальки не починали а звлаща претивку хре[с]тияном николи меча нашого подносити не желали,якож и не дали есьмо причины ку тому, бо для того и отчизных г(о)с(по)д(а)рств наших от продков великого князя московского несправедливе посягнены через меч кровопролитьем не отыскивалиесьмо, гдежь и от него самого за утисьненьем и великим а нехрестияньским розлитьем крови у паньстве нашом земли Ифлянтскои и в отчизных г(о)с(по)д(а)рствах наших укривженья подцаныхпостерегали есьмо всего доброго хрестиянського, для чого и дворянина нашого пана Баркулаба Ивановича Корсака послали есьмо до того неприятеля напоминаючи, абы з нами постановенье вчинил а кровопролитья у хрестияньстве не жодал и то, што незбожне а несправедливе забрано, отступил. Он через присягу свою, которую он учинил и в перемирном листе описал, иж послов и каждого с подданых наших не задерживаючи и по вышлю перемиря добровольне выпустити мел, того посланьца нашого и в многих местах своих и купецких людей задержавши зрадливе и неотповедне на кров хрестияньску, на люд Божий, панованья и владанья нашого границы отчизного нашого г(о)с(по)д(а)рства войска свои уславши, сказу и плен чинил, што воли Божои поручивши, умыслили есьмо тые незбожные поступки, которие, яко негодно хрестиянину чинити, паньствам нашим оказует, над ним самым и над паньством его, з Божею помочю, також аказати, якож вжо воеводу Троцкого, гетмана нашого навышшого Великого Князства Литовского, старосту мозырского, державцу лидског[о], белицкого и сомилишского, пана Миколая Юрьевича Радивила з войском нашим противко того неприятеля нашого отправуем, и иные войска купосилку с Польски ведем, а и сами теж, оземши Бога на помочь, приидеть ли до того каждое потребы, особою нашою г(о)с(по)д(а)рскою, опустити не хочем, а вам приказуєм, ажбы есте с почетом слуг ваших конно, збройно, яко службу земскую служити и заступовати повинни, ехали до замку нашого Речицы до старосты луцького, браславского и веницкого, князя Богуша Федоровича Корецкого, которому есьмо вжо там тягнути росказали, и на певныи час, то есть на день с(вя)тог(о) Николы, теперешнего пришлого свята, у него становили ся бы есте конечно, инак того вчинити не смеючи, стерегучи ласки нашое, а непослушные каранья в Статуте описаного, кгдыж перво сего о готовость и при роспущеньи з дороги зимнее листы нашими росказано всим поготову быти и часу потребы яко на кгвалт тягнути, чого тепер есть великая потреба, прото абы нихто ослухатися и омешкати часу назначоного не сьмел, а так будучи при нем жебы есте у службах наших и земских послушенствоку нему чинили и по звыклои вере вашои нам, г(о)с(по)д(а)ру, и Речи Посполитои служили, неприятелю отпор а паньству нашому оборону чинили, сколько вам Бог м(и)л(о)стивыи поможеть. А естли бы княз староста за кгвалтовною потребою поспешил упередити тот день и рок назначоныи, вы бы вже и того року назначоног[о] и листов от него не ждучи, але доведавши ся о выеханьи его, яко на кгвалт тягнули и за ним поспешили ся. Пак ли ж бы вам от пана воеводы Троцкого, гетьмана нашого росказано отьтоль з Речицы где на иное местце рушити ся або кгды бы такеж за кгвалтовною потребою пан воевода Троцкий хотя и первеи того року, вам в Речицы становити ся назначоного противко неприятеля сам рушив ся до себе вам тягнути росказал, а тое бы росказанье вас в дорозеабо дома зостало, приказуєм, абы кождыи з вас, кого листы своими его милост обошлеть, або хотя бы хто и листом его милости обослан не был, одно кого ведомость о рушеньи его доидеть, жебы есте во всем подле науки его милости заховали ся и до его милости с почты своими конно, збройно, [ку] отпору неприятелю спешне тягнули, никоторого сплошеньства в том, яко в речи земской,вчинити не сьмеючи конечно. [...]