Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

І Статут Великого князівства Литовського про організацію державної військової служби (1529 р.)

РОЗДЕЛ ВТОРЫЙ

[...]

1. Иж вси повинни становитися под хороговью своею поветовою и шиховатися

Хочем и тэж приказуєм грозно, абы вси подцаные наши военную службу повинни не инде бы ся шиховати ани ся инде становили персунами своими, только под хороговью своею поветовою, в котором повете суть осели, кром особного росказанья гетманского. А естли бы который з них службу мел в неякого з панов рад наших або врадников, або тэж в кого иного, тот будеть повинен местца своего подле пана своего, которому прислугует, ким иным, войны не повинным, осадити, а местца своего хоруговного, яко повиннейшого, жадною мерою опустити в омешкати не смел под страченьем именья своего. А которые с подцаных наших мають в ынших поветех розные свои именья, тот маеть в том повете со всим своим почтом з ыменей купленых и выслужоных, отчизных и ж женского именья стати, в котором повете будеть его именье отчизное головное. И тэж которые слуги князьские и панские, маючи под князьми и пань именье, а другие именья под господарем покупили, тогды в час потребы, оставшивши пана своего, маеть подле хоругови ся становити для тых именей своих, которые под королем покупили. А естли быхто таковый под хороговью, под которою именье купил, стати не хотел, тогды тот именье на господара тратить.

2. Духовные з ыменья закупного повинни сами персунами на службу господарскую ехати

Тэж коли бы которые духовные именье закупное держал, тогды з ыменья закупного повинен будеть сам своею парсуною подле уставы нашое службу нашу господарскую и земскую заступати. Естли ж который духовный будеть мети именье дедизное, тогды повинен будеть з ыменья дедизного на службу нашу земскую выправовати, а их самих парсуны будуть на ласце вашой господарской.

3. Кождый по шиху маеть на том почте при господари або при гетмане служити

Тэж уставляем, иж кождый подданый наш, шиховавши и подписавши ся обычаем, выщей писаным, с тыми ж коньми и всим станком, с которым ся шиховал, при нас и потомках наших, также и при гетманех наших земских або иных, через нас або потомки наши, на то поставлених, повинен будеть войну служити на тых же конех; слуг и статку своего, с которым ся шиховал и пописал, не маетьз войны отсылати аж до роспущенья зуполного войска нашого. А который бы колве подданый наш то смел вчинити против тое уставы нашое, будет ли оселый, тот именье тратить, как на войне не был. А естли бы хто тое вчинил, пенези бравши, а чоловек не оселый, таковый кождый честь свою тратить, якобы з битвы втек. А пописавши кождого коня, маеть в шерсть написати и клейно его маеть на рейстр намалевати. А станы свои вси поветники мають в одном месте при хоружому мети, а розно не мають стояти.

4. Которые для немоцы своее не можеть на войну ехати, маеть перед гетманом немоц свою объявити

Естли бы хто правдиве немоцон был а для того не годен был службе нашой земской, а не мел бы тот немодный сына, ку службе военной годного, або тот сын у двора нашого господарского служил,або тэж з отцом делен был, тогды таковый немодный мает ся дать везти до гетмана нашого а тую немоц свою объявити. Естли гетман познаеть, иж тот немодный для хоробы своее ку службе земской не ест годен, маеть его самого на тот час с тое службы выпустити, а тот немодный повинен будеть место себе з ыменья своего слуги свои на войну выправити тым же обычаем, яко вышей выписано под сведомом листов гетмана нашого земского. А немодный, естли не мог ехати до гетмана нашого, мает ся оповедити враднику а хоружому, а двум земяном, которые мають перед гетманом под честью и под верою поведить, иж управде ест немоцон. А естли бы хоружий поведил о ком-кольве, иж бы был немоцон, а он бы был здоров, а то бы на того хоружого справедливе правом было переведено, тогды тот хоружий маеть именье свое власное тратити.

5. Естли бы хто мел сына, который бы мог службу земскую заступити, маеть его гетману оказати, естли будеть годен за его служить

Пак ли бы хто был здоров а мел сына, который ся от него не отделил, ани тэж служить у двора нашого господарского, а будеть тому от семнадцати лет, он можеть за отца на войну ехати; а маеть сам с тым же сыном до гетмана нашого ехати. А естли гетману будет ся видети, их оный сын годен ест ку службе военной, тогды тот сын за отца военную службу заступити маеть а с тымпочтом, как отец его мел служити. А пак ли бы тот сын не здал ся гетману добре годный, тогды сам отец маеть на войну ехати. [...]

13. На войне будучи, не маеть нихто на домы и іумна шляхетские наеждчати

Тэж уставуем: хто бы, на войне будучи, который шляхтич наеждчал на дом або гумно которого шляхтича або, едучи на войну, по дорозе грабил, а переведено бы то на него, што пограбил абопошкодил, тогды, иле кроть будеть тот на дом або на гумна наеждчати або по дорозе грабити тот за кождым своим наездом и по дорозе браньем маеть кгвалт платити.

14. А кому бы стацый на войне на самого и на кони его не достало

Кому бы не достало, будучи на войне, стацей и самому естли або на кони его, тоди маеть тот з вижом гетманским где ехати або пойти и взяти с потребу живности собе и на кони, а то маетьзаплатити подлуг уставы положоное. А дрова мають брати, где будуть стояти, нижли домов розбирати и плотов жечи, и ставов волочити ани спускати, ани жит и ярин топтати и травити не мають. А естли бы хто таковую шкоду вчинил, тогды маеть гетман наш таковых в ланцуг сажати, а предся оный тую шкоду маеть отправовати, и кгвалт платити.

А естли бы хто, будучи на службе нашой, на войне, нашол один на другого, на обоз або на стан кгвалтом а ранил або вдарил кого, таковый, яко кгвалтовник, горло тратить. [...]