Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Уставна грамота київського воєводи, за якою ремісничі цехи підпорядковувалися міській ратуші (1518 p., січня 9)

Я, Андрей Немировичь, воєвода Киевский, вызнаваем сим нашим листом войту и бурмистром, и радцам, и всим мешаном места Киевского. Мовили нам о тые врады местские, которые ж перво сего их к замку вживали а на место к ратуши, и на то они покладали перед нами данину прывилья и листы господара нашого, короля его милости Жыкгимонта, и в тых их прывильях выписано стоить: иж его милость господар наш, тые вси врады городовые отдаливши от замку своего, и дал их мешаном к ратушу месту своему вжывати и в них се справовати, немней, яко у их прывильях им выписано и как их право Майдеборское несеть, кравцы, кушнеры, шевцы, постригали, золотари, стрелники, винники, лучники, ковали и радовницы, мыто рыбное, повечщыны, грош варовый, мыто соляное; а с тых всих ремесников его милость господарь наш на замок свой вынял по два ремесники мети к замку; естли бы теж которая потреба господарская и земская вказывала, а не наша, тых всих ремесников, тогды они вси мають робити, которых кольве будеть потреба, без всякое месткое выловы. А што се теж ткнет плотников, его милость господар мешаном того не поступил и в прывильях своих им не выписал, мають они таки к замку служити и городового присуда вживати, водлуг давного обычая; и теж што се дотычеть капщизны з места Киевского, мають они давати с кождое корчмы на кождый год по две копе грошей в монете Литовской; а которому коли слузе своему роскажем капщызну брати, тому они мають давати с корчмы по чотыры гроши, подле обычая; а до шинкарок никоторого дела не маеть, нижли мають шинкарки к ратушу права их Маитборского з местом вжывати. И теж которые кольве мешкають в месте Киевском оные, которые торгом ее обыходять, и в безмен важать, и в локоть мерять, и на ряду стоять: тые вси люди и теж наши мають к ратушу места Киевского они плат давати и во всех местских платех помоцни быти, яко их право Маитборское в собе ее маеть. И били нам чолом, абыхмо тых всих врадов к ратушу им поступили. И я, водле привилья и росказанья господаря нашого и на них чоломбитье тых всих врадов вышейписаных, им к ратуше поступил; в них они мають справовати и радити, как сами налепей розумеючи, а мне, воеводе и моим врадником вже се в тые врады ни в которые не вступати. [...]