Ваша електронна бібліотека

Про історію України та всесвітню історію

Наскрізний зріз української історії від найдавніших часів до сьогодення

Жалувана грамота Владислава III православному духовенству про зрівняння його у правах з римо католиками і про повернення йому духовних судів і вотчин (1443 p., березня 22)

[...] а про то, кгды ж за ласкою и справою Духа Светого, церков Восточная набожества Греческого и Руского, котрая [...] некгдысь, через час долгий, в неякой разности и в расколе веры светое и светых сакраментов, не без утраты и згубы многих спасению, от единости светое Римское церкви хвеялася, — которое единости отцеве наши и овшем увесь люд католический за часов наших видети желали, теперь вже, за милосердем Божим сузнанем светейшого пана, Евгения папы четвертого, и иных многих отец веры светое горливых, з оною светою Римскою и Вселинскою церковью приведена есть до единости давно пожеданое. [...] А над то хочем мети, и сим листом нашим сказуем, абы от сего часу, жаден з дигнитаров, старост, врядников и обывателев панств и зподданных наших, якого-колвек стану и достоенства быти мели, а звлаща королевства нашого Полского верхуписаные, а особливе земель наших Руских и Подолских и иных прилеглые, владзы пререченых епископов, владык и иных преложоных тогож набожества Греческого и Руского, а ни судов их поповских, а звлаща в справе разводов малженских, от сего часу, нияким способом не прекажали [...] А над то, абы тые ж епископове албо владыкове и иные предложеные особы церковные помененого набожества Греческого и Руского, маючи слушное поживенье, ко отправленью хвалы Божое тым способнейшие быти могли: им самым и их церквам всим, кгде-колвек в панствах наших будучым, вси села и державы, якиеж-колвек и якими-колвек имены названые, которы з стародавна до оных церквей належали, и через якиеж-колвек особы и кгдеколвек в панствах и поветах наших аж доселя держаны суть, зо всими их правами, побожною тихостью умыслили есмо привернути [...]